khoya hua tha hasil hone wala hun

khoyā huā thā hāsil hone vaalā huuñ

maiñ kāġhaz par nāzil hone vaalā huuñ

chhoḌ aayā huuñ pīchhe sab āvāzoñ ko

ḳhāmoshī meñ dāḳhil hone vaalā huuñ

ḳhud hī apnā rasta dekh rahā huuñ maiñ

ḳhud hī apnī manzil hone vaalā huuñ

mujh ko sharīk-e-mahfil bhī kab samjheñ vo

maiñ jo jān-e-mahfil hone vaalā huuñ

jaane kyā kah jā.egā Dar lagtā hai

ā.īñe ke muqābil hone vaalā huuñ

ruuh sulagtī aur pighaltī jaatī hai

ek badan meñ shāmil hone vaalā huuñ

āḳhir kab tak apne naaz uThā.ūñ 'shāz'

aaj apnā hī qātil hone vaalā huuñ

khoya hua tha hasil hone wala hun

main kaghaz par nazil hone wala hun

chhoD aaya hun pichhe sab aawazon ko

KHamoshi mein daKHil hone wala hun

KHud hi apna rasta dekh raha hun main

KHud hi apni manzil hone wala hun

mujh ko sharik-e-mahfil bhi kab samjhen wo

main jo jaan-e-mahfil hone wala hun

jaane kya kah jaega Dar lagta hai

aaine ke muqabil hone wala hun

ruh sulagti aur pighalti jati hai

ek badan mein shamil hone wala hun

aaKHir kab tak apne naz uThaun 'shaz'

aaj apna hi qatil hone wala hun