KHud-agahi ka ajab rog lag gaya hai mujhe

ḳhud-āgahī kā ajab rog lag gayā hai mujhe

ki apnī zaat pe dhoka tirā huā hai mujhe

pukārtī hai havāoñ kī naġhmagī tujh ko

sukūt jhiil kā āvāz de rahā hai mujhe

ajiib zauq-e-mohabbat atā kiyā tū ne

vajūd-e-sang bhī tahzīb-e-ā.īna hai mujhe

maiñ apne naam se nā-āshnā sahī lekin

tumhāre naam se har shaḳhs jāntā hai mujhe

maiñ apne ghar ke diye bhī bhulā.e baiThā huuñ

tire ḳhayāl ne ye hausla diyā hai mujhe

kahāñ ye fursat-e-kāvish ki tujh ko yaad karūñ

shu.ūr-e-zāt kā darpesh marhala hai mujhe

'ra.īs' sher kī duniyā se kyā ġharaz mujh ko

kisī kī yaad ne shā.ir banā diyā hai mujhe

KHud-agahi ka ajab rog lag gaya hai mujhe

ki apni zat pe dhoka tera hua hai mujhe

pukarti hai hawaon ki naghmagi tujh ko

sukut jhil ka aawaz de raha hai mujhe

ajib zauq-e-mohabbat ata kiya tu ne

wajud-e-sang bhi tahzib-e-aina hai mujhe

main apne nam se na-ashna sahi lekin

tumhaare nam se har shaKHs jaanta hai mujhe

main apne ghar ke diye bhi bhulae baiTha hun

tere KHayal ne ye hausla diya hai mujhe

kahan ye fursat-e-kawish ki tujh ko yaad karun

shuur-e-zat ka darpesh marhala hai mujhe

'rais' sher ki duniya se kya gharaz mujh ko

kisi ki yaad ne shair bana diya hai mujhe