KHud-agahi ne lahu mein Dubo diya mujhko

ḳhud-āgahī ne lahū meñ Dubo diyā mujh ko

shu.ūr-e-zāt kī aisī milī sazā mujh ko

misāl-e-gauhar-e-nāyāb zer-e-āb rahā

ye aarzū thī samundar uchhāltā mujh ko

maiñ TimTimātā huā tīrgī se laḌtā rahā

talāsh kartī rahī sar-phirī havā mujh ko

vo be-shumār dafīne na yuuñ paḌe rahte

agar zamāna salīqe se khodtā mujh ko

milā kisī ko sukūt-e-davām o be-ḳhabarī

lahū meñ Duubā huā ye qalam milā mujh ko

jabīñ pe kyā kiyā tahrīr ḳhāma-e-haq ne

ki āgahī bhī samajhtī hai sar-phirā mujh ko

maiñ hārtā hī gayā zindagī kī har baazī

shikast detī rahī umr bhar anā mujh ko

chaTaḳh rahā hai badan aur dhuāñ dhuāñ hai dil

kisī ne dī hai sulagne kī badduā mujh ko

qusūr merā yahī thā ki be-qusūr thā maiñ

amīr-e-shahr ne phir bhī jalā diyā mujh ko

yahāñ vahāñ sar-e-bāzār ḳhuuñ bahā merā

ajiib hai ki chukānā hai ḳhūñ-bahā mujh ko

agar maiñ dard se chīḳhūñ to hai adākārī

dikhā.ūñ zaḳhm to kahte haiñ ḳhud-numā mujh ko

maiñ apne haath meñ apnā burīda sar le kar

chalā to rok rahī thī koī sadā mujh ko

kabhī charāġh jalā.ūñ to kaañp jaatā huuñ

har ek aag se lagtā hai ḳhauf sā mujh ko

ba-fazl-e-ābla-pā.ī ba-faiz-e-tishna-labī

sarāb DhūñDh rahā hai barahna-pā mujh ko

abhī mahal ke dar-o-bām nā-mukammal haiñ

ye kis ne ḳhvāb se aa kar jagā diyā mujh ko

har inkishāf pe hairat-zada khaḌā rahtā

agar vo baiTh ke fursat meñ sochtā mujh ko

na jaane kab se hai us paar dekhne kī havas

fasīl-e-zāt se uupar zarā uThā mujh ko

KHud-agahi ne lahu mein Dubo diya mujh ko

shuur-e-zat ki aisi mili saza mujh ko

misal-e-gauhar-e-nayab zer-e-ab raha

ye aarzu thi samundar uchhaalta mujh ko

main TimTimata hua tirgi se laDta raha

talash karti rahi sar-phiri hawa mujh ko

wo be-shumar dafine na yun paDe rahte

agar zamana saliqe se khodta mujh ko

mila kisi ko sukut-e-dawam o be-KHabari

lahu mein Duba hua ye qalam mila mujh ko

jabin pe kya kiya tahrir KHama-e-haq ne

ki aagahi bhi samajhti hai sar-phira mujh ko

main haarta hi gaya zindagi ki har bazi

shikast deti rahi umr bhar ana mujh ko

chaTaKH raha hai badan aur dhuan dhuan hai dil

kisi ne di hai sulagne ki baddua mujh ko

qusur mera yahi tha ki be-qusur tha main

amir-e-shahr ne phir bhi jala diya mujh ko

yahan wahan sar-e-bazar KHun baha mera

ajib hai ki chukana hai KHun-baha mujh ko

agar main dard se chiKHun to hai adakari

dikhaun zaKHm to kahte hain KHud-numa mujh ko

main apne hath mein apna burida sar le kar

chala to rok rahi thi koi sada mujh ko

kabhi charagh jalaun to kanp jata hun

har ek aag se lagta hai KHauf sa mujh ko

ba-fazl-e-abla-pai ba-faiz-e-tishna-labi

sarab DhunDh raha hai barahna-pa mujh ko

abhi mahal ke dar-o-baam na-mukammal hain

ye kis ne KHwab se aa kar jaga diya mujh ko

har inkishaf pe hairat-zada khaDa rahta

agar wo baiTh ke fursat mein sochta mujh ko

na jaane kab se hai us par dekhne ki hawas

fasil-e-zat se upar zara uTha mujh ko