خود عکس ہی چہرہ کا آئینے میں ڈھلتا ہے

خود عکس ہی چہرہ کا آئینے میں ڈھلتا ہے

آئینہ بدلنے سے کب چہرہ بدلتا ہے

گفتار سے ہوتا ہے کردار کا اندازہ

عنواں سے فسانے کا مفہوم نکلتا ہے

آج اپنی روش پر وہ خود سر بہ گریباں ہے

اخلاص کی گرمی سے پتھر بھی پگھلتا ہے

نسبت ہے جسے ان سے وہ درد ہے پایندہ

ہر درد کہاں ورنہ نغمات میں ڈھلتا ہے

میں معترف جرم اظہار صداقت ہوں

یہ طرز حیات اب کیوں احباب کو کھلتا ہے

یہ نرم روی طالبؔ پھولوں میں روا رکھئے

پتھر کا کلیجہ تو تیشے سے دہلتا ہے