KHud apni lau mein tha mehrab-e-jaan mein jalta tha

ḳhud apnī lau meñ thā mehrāb-e-jāñ meñ jaltā thā

vo musht-e-ḳhāk thā lekin charāġh jaisā thā

vo gum huā to mazāmīn ho ga.e be-rabt

vahī to thā jo mirā markazī havāla thā

mire ḳhayāl kī tajsīm hai vajūd tirā

tire liye baḌī shiddat se maiñ ne sochā thā

vo sirf apnī hudūd-o-quyūd kā niklā

us ek shaḳhs ko kyā kyā samajh ke chāhā thā

makāñ banā ke use band kar diyā varna

ye rāsta kisī manzil ko jaane vaalā thā

ye vāqi.a hai ki ham ne vo rū-e-nādīda

baġhair minnat-e-chashm-o-nigāh dekhā thā

muāni-e-shab-e-tārīk khul rahe the 'salīm'

jahāñ charāġh nahīñ thā vahāñ ujālā thā

KHud apni lau mein tha mehrab-e-jaan mein jalta tha

wo musht-e-KHak tha lekin charagh jaisa tha

wo gum hua to mazamin ho gae be-rabt

wahi to tha jo mera markazi hawala tha

mere KHayal ki tajsim hai wajud tera

tere liye baDi shiddat se main ne socha tha

wo sirf apni hudud-o-quyud ka nikla

us ek shaKHs ko kya kya samajh ke chaha tha

makan bana ke use band kar diya warna

ye rasta kisi manzil ko jaane wala tha

ye waqia hai ki hum ne wo ru-e-nadida

baghair minnat-e-chashm-o-nigah dekha tha

muani-e-shab-e-tarik khul rahe the 'salim'

jahan charagh nahin tha wahan ujala tha