KHud apni pyas se tum intiqam mat lena

ḳhud apnī pyaas se tum intiqām mat lenā

kisī bhī shaḳhs ke hāthoñ se jaam mat lenā

yaqīñ na ho to judā ho ke dekh lo ham se

hamārī yaad na aa.e to naam mat lenā

guzār denā ġharībī meñ zindagī lekin

amīr-e-shahr ke dāman ko thaam mat lenā

zamāne bhar ko mohabbat se jiit jāoge

magar kabhī bhī adāvat se kaam mat lenā

mile agar jo kabhī rāstā badal lenā

ġharaz-parast kā hargiz salām mat lenā

ye lat burī hai miyāñ aap apne hāthoñ meñ

kahā hai mere buzurgoñ ne jaam mat lenā

koī kisī kā nahīñ daur-e-bevafā.ī meñ

kisī se apnī mohabbat kā daam mat lenā

KHud apni pyas se tum intiqam mat lena

kisi bhi shaKHs ke hathon se jam mat lena

yaqin na ho to juda ho ke dekh lo hum se

hamari yaad na aae to nam mat lena

guzar dena gharibi mein zindagi lekin

amir-e-shahr ke daman ko tham mat lena

zamane bhar ko mohabbat se jit jaoge

magar kabhi bhi adawat se kaam mat lena

mile agar jo kabhi rasta badal lena

gharaz-parast ka hargiz salam mat lena

ye lat buri hai miyan aap apne hathon mein

kaha hai mere buzurgon ne jam mat lena

koi kisi ka nahin daur-e-bewafai mein

kisi se apni mohabbat ka dam mat lena