KHud apni yaad dila ke rula diya hai mujhe

ḳhud apnī yaad dilā ke rulā diyā hai mujhe

vo ek shaḳhs ki jis ne bhulā diyā hai mujhe

tire karam kā sazā-vār maiñ rahā jab tak

ġham-e-hayāt ne bhī rāsta diyā hai mujhe

havā-e-shauq ne terī talāsh meñ aksar

misāl-e-barg-e-shikasta uḌā diyā hai mujhe

zarā sī aañkh lagī thī jo apnī āḳhir-e-shab

havā-e-sub.h ne aa kar jagā diyā hai mujhe

chaman meñ tū rahā jab tak gulāb kī sūrat

nasīm-e-sub.h ne terā patā diyā hai mujhe

ye apnā apnā muqaddar hai is ko kyā kahiye

tujhe sarāb to dariyā banā diyā hai mujhe

ba-rañg-e-shīsha thā pahle ab ek patthar huuñ

nazar se apnī jo tū ne girā diyā hai mujhe

ḳhayāl-o-ḳhvāb kī bāteñ ḳhayāl-o-ḳhvāb huiiñ

shu.ūr-e-zīst ne jiinā sikhā diyā hai mujhe

KHud apni yaad dila ke rula diya hai mujhe

wo ek shaKHs ki jis ne bhula diya hai mujhe

tere karam ka saza-war main raha jab tak

gham-e-hayat ne bhi rasta diya hai mujhe

hawa-e-shauq ne teri talash mein aksar

misal-e-barg-e-shikasta uDa diya hai mujhe

zara si aankh lagi thi jo apni aaKHir-e-shab

hawa-e-subh ne aa kar jaga diya hai mujhe

chaman mein tu raha jab tak gulab ki surat

nasim-e-subh ne tera pata diya hai mujhe

ye apna apna muqaddar hai is ko kya kahiye

tujhe sarab to dariya bana diya hai mujhe

ba-rang-e-shisha tha pahle ab ek patthar hun

nazar se apni jo tu ne gira diya hai mujhe

KHayal-o-KHwab ki baaten KHayal-o-KHwab huin

shuur-e-zist ne jina sikha diya hai mujhe