KHud apni zat ki tashhir ku-ba-ku kiye jaen

ḳhud apnī zaat kī tash.hīr kū-ba-kū kiye jaa.eñ

ḳhudā mile na mile us kī justujū kiye jaa.eñ

ajiib jaarī huā ab ke hukm-e-hākim-e-shahr

asiir saare taraf-dār-e-rañg-o-bū kiye jaa.eñ

hameñ pasand nahīñ zarf-e-mai meñ qatra-e-mai

hamāre sāmne ḳhālī ḳhum-o-subū kiye jaa.eñ

jahāñ bhī aa.eñ nazar chaak chaak dāman-e-dil

vo taar pairahan-e-ishq se rafū kiye jaa.eñ

kuchh ab ke aise paḌā sāya-e-tunuk-zarfī

samundaroñ ko bhī ham log aabjū kiye jaa.eñ

ḳhizāñ ne jin ke muqaddar meñ zardiyāñ likh diiñ

ham un gulāb-rutoñ ko bhī surḳh-rū kiye jaa.eñ

janāb-e-'mohsin'-e-ehsāñ se iltijā hai ki vo

pahuñch ga.e haiñ sar-e-āb to vuzū kiye jaa.eñ

KHud apni zat ki tashhir ku-ba-ku kiye jaen

KHuda mile na mile us ki justuju kiye jaen

ajib jari hua ab ke hukm-e-hakim-e-shahr

asir sare taraf-dar-e-rang-o-bu kiye jaen

hamein pasand nahin zarf-e-mai mein qatra-e-mai

hamare samne KHali KHum-o-subu kiye jaen

jahan bhi aaen nazar chaak chaak daman-e-dil

wo tar pairahan-e-ishq se rafu kiye jaen

kuchh ab ke aise paDa saya-e-tunuk-zarfi

samundaron ko bhi hum log aabju kiye jaen

KHizan ne jin ke muqaddar mein zardiyan likh din

hum un gulab-ruton ko bhi surKH-ru kiye jaen

janab-e-'mohsin'-e-ehsan se iltija hai ki wo

pahunch gae hain sar-e-ab to wuzu kiye jaen