KHud-ba-KHud dida-o-dil mein jo samaya jae

ḳhud-ba-ḳhud dīda-o-dil meñ jo samāyā jaa.e

haa.e us shaḳhs ko kis tarah bhulāyā jaa.e

ek ik zarre ko ā.īna banāyā jaa.e

jalva-e-husn-e-nazar un ko dikhāyā jaa.e

baat jab hai ki na guzre dil-e-nāzuk pe girāñ

shauq se hāl-e-shab-e-hijr sunāyā jaa.e

māh-o-anjum haiñ kahīñ aur kahīñ lāla-o-gul

dāman-e-shauq ko kis kis se bachāyā jaa.e

kaisī pābandī-e-zindāñ ki hai fitrat āzād

ḳhūn-e-dil se chaman-e-tāza banāyā jaa.e

sheva-e-zabt kā ai dost taqāzā hai yahī

dil kā har raaz ḳhud un se bhī chhupāyā jaa.e

un kī mahfil meñ agar rasm-e-zabāñ-bandī hai

qissa-e-shauq nigāhoñ se sunāyā jaa.e

sāya-e-barq meñ ai josh-e-mazāq-e-ta.amīr

āshiyāñ roz gulistāñ meñ banāyā jaa.e

hone paa.e na kahīñ zindagī be-kaif 'nazīr'

ek hangāma-e-ḳhāmosh machāyā jaa.e

KHud-ba-KHud dida-o-dil mein jo samaya jae

hae us shaKHs ko kis tarah bhulaya jae

ek ek zarre ko aaina banaya jae

jalwa-e-husn-e-nazar un ko dikhaya jae

baat jab hai ki na guzre dil-e-nazuk pe giran

shauq se haal-e-shab-e-hijr sunaya jae

mah-o-anjum hain kahin aur kahin lala-o-gul

daman-e-shauq ko kis kis se bachaya jae

kaisi pabandi-e-zindan ki hai fitrat aazad

KHun-e-dil se chaman-e-taza banaya jae

shewa-e-zabt ka ai dost taqaza hai yahi

dil ka har raaz KHud un se bhi chhupaya jae

un ki mahfil mein agar rasm-e-zaban-bandi hai

qissa-e-shauq nigahon se sunaya jae

saya-e-barq mein ai josh-e-mazaq-e-tamir

aashiyan roz gulistan mein banaya jae

hone pae na kahin zindagi be-kaif 'nazir'

ek hangama-e-KHamosh machaya jae