KHud-faramoshi mein KHayal kahan

ḳhud-farāmoshī meñ ḳhayāl kahāñ

maiñ kahāñ hasrat-e-jamāl kahāñ

na vo aañsū haiñ aur na vo aaheñ

ab vo aglā sā apnā haal kahāñ

dil-e-vahshī ne sar uThāyā hai

dūr-andeshī-e-ma.āl kahāñ

ġham-e-duniyā meñ sar hai sargardāñ

ab vo nairañgī-e-ḳhayāl kahāñ

ahd-e-rafta ko bhūlnā achchhā

vo zamāna vo māh-o-sāl kahāñ

ho shikāyat kisī se nā-mumkin

ye jasārat kahāñ majāl kahāñ

kis tarah dāstān-e-ġham kahe

koī pursān-e-arz-e-hāl kahāñ

KHud-faramoshi mein KHayal kahan

main kahan hasrat-e-jamal kahan

na wo aansu hain aur na wo aahen

ab wo agla sa apna haal kahan

dil-e-wahshi ne sar uThaya hai

dur-andeshi-e-maal kahan

gham-e-duniya mein sar hai sargardan

ab wo nairangi-e-KHayal kahan

ahd-e-rafta ko bhulna achchha

wo zamana wo mah-o-sal kahan

ho shikayat kisi se na-mumkin

ye jasarat kahan majal kahan

kis tarah dastan-e-gham kahe

koi pursan-e-arz-e-haal kahan