KHud-farebi ne be-shak sahaara diya aur tabiat ba-zahir bahalti rahi

ḳhud-farebī ne be-shak sahārā diyā aur tabī.at ba-zāhir bahaltī rahī

ek kāñTā sā dil meñ khaTaktā rahā ek hasrat sī dil ko masaltī rahī

apne ġham ko hamesha bhulāyā kiye kasrat-e-kār meñ sair-e-bāzār meñ

al-ġharaz kasmapursī ke aalam meñ bhī zinda rahne kī sūrat nikaltī rahī

aql kī bartarī dil ne maanī to kyā us ne chāhā kabhī aql kā mashvara

dil ko jis tarah chalnā thā chaltā rahā aql har gaam par haath maltī rahī

bazm-e-hastī meñ aane ko aa.e sabhī ahl-e-dil ahl-e-dīñ shā.ir-o-falsafī

aadmī ko jo karnā thā kartā rahā aur duniyā ba-dastūr chaltī rahī

is kī sūrat jo chāho badal jā.egī jaise sāñche meñ Dhāloge Dhal jā.egī

koī sāñcha yahāñ harf-e-āḳhir nahīñ zindagī to hamesha badaltī rahī

aadmī saath rahne pe majbūr hai phir bhī ik dūsre se bahut duur hai

dushmanoñ se to hotī bhalā sulh kyā jabki ḳhud dostoñ se bhī chaltī rahī

KHud-farebi ne be-shak sahaara diya aur tabiat ba-zahir bahalti rahi

ek kanTa sa dil mein khaTakta raha ek hasrat si dil ko masalti rahi

apne gham ko hamesha bhulaya kiye kasrat-e-kar mein sair-e-bazar mein

al-gharaz kasmapursi ke aalam mein bhi zinda rahne ki surat nikalti rahi

aql ki bartari dil ne mani to kya us ne chaha kabhi aql ka mashwara

dil ko jis tarah chalna tha chalta raha aql har gam par hath malti rahi

bazm-e-hasti mein aane ko aae sabhi ahl-e-dil ahl-e-din shair-o-falsafi

aadmi ko jo karna tha karta raha aur duniya ba-dastur chalti rahi

is ki surat jo chaho badal jaegi jaise sanche mein Dhaaloge Dhal jaegi

koi sancha yahan harf-e-aKHir nahin zindagi to hamesha badalti rahi

aadmi sath rahne pe majbur hai phir bhi ek dusre se bahut dur hai

dushmanon se to hoti bhala sulh kya jabki KHud doston se bhi chalti rahi