KHud hamin ko rahaton ke kaif ka chaska na tha

ḳhud hamīñ ko rāhatoñ ke kaif kā chaskā na thā

zindagī kā zahr varna is qadar kaḌvā na thā

us ne tanhā.ī se ghabrā kar pukārā to nahīñ

is se pahle to mirā dil is tarah dhaḌkā na thā

haa.e vo aalam ki un kī bazm meñ bhī baiTh kar

maiñ yahī sochā kiyā maiñ to kabhī tanhā na thā

us ke apne haath ruḳhsāroñ ko sahlāne lage

go ba-zāhir merī bābat us ne kuchh sochā na thā

har taraf khiltī rahīñ kaliyāñ nasīm-e-sub.h se

apnī qismat meñ sabā kā ek bhī jhoñkā na thā

zindagī ai zindagī!! aa do ghaḌī mil kar raheñ

tujh se merā umr-bhar kā to koī jhagḌā na thā

sochte haiñ ab use 'āzād' ham kyā naam deñ

umar kā vo daur dil meñ jab koī saudā na thā

KHud hamin ko rahaton ke kaif ka chaska na tha

zindagi ka zahr warna is qadar kaDwa na tha

us ne tanhai se ghabra kar pukara to nahin

is se pahle to mera dil is tarah dhaDka na tha

hae wo aalam ki un ki bazm mein bhi baiTh kar

main yahi socha kiya main to kabhi tanha na tha

us ke apne hath ruKHsaron ko sahlane lage

go ba-zahir meri babat us ne kuchh socha na tha

har taraf khilti rahin kaliyan nasim-e-subh se

apni qismat mein saba ka ek bhi jhonka na tha

zindagi ai zindagi!! aa do ghaDi mil kar rahen

tujh se mera umr-bhar ka to koi jhagDa na tha

sochte hain ab use 'azad' hum kya nam den

umar ka wo daur dil mein jab koi sauda na tha