خود ہی محبوب لیے اپنا پیام آیا ہے

خود ہی محبوب لیے اپنا پیام آیا ہے

منزل عشق میں ایسا بھی مقام آیا ہے

کوئی خط آیا ہے ان کا نہ پیام آیا ہے

دیدۂ دل کے لئے سخت مقام آیا ہے

دیکھیے کیسے کٹے رات پڑی ہے ساری

پھر تصور میں کوئی اب سر شام آیا ہے

آپ اپنی بھی خبر اب نہیں ملتی اے دوست

وادیٔ عشق میں کیسا یہ مقام آیا ہے

ہائے کیا چیز ہے یہ اہل محبت کا خلوص

دشمنوں کے لئے بھی ان کا سلام آیا ہے

جو بھی مل جائے وہ ساقی کی عنایت کہئے

یہ بھی کیا کم ہے کہ درد تہ جام آیا ہے

آپ کیوں چلتے زمانے کی روش سے ہٹ کر

وقت پڑنے پہ کسی کے کوئی کام آیا ہے

ڈرتے ڈرتے تری رحمت کا سہارا لے کر

تیرے دربار میں مولیٰ یہ غلام آیا ہے

اے ذکیؔ حشر میں رحمت کی نظر ہے مجھ پر

دل ترسیدہ بڑے وقت پہ کام آیا ہے