KHud hi mahbub liye apna payam aaya hai

ḳhud hī mahbūb liye apnā payām aaya hai

manzil-e-ishq meñ aisā bhī maqām aaya hai

koī ḳhat aaya hai un kā na payām aaya hai

dīda-e-dil ke liye saḳht maqām aaya hai

dekhiye kaise kaTe raat paḌī hai saarī

phir tasavvur meñ koī ab sar-e-shām aaya hai

aap apnī bhī ḳhabar ab nahīñ miltī ai dost

vādī-e-‘ishq meñ kaisā ye maqām aaya hai

haa.e kyā chiiz hai ye ahl-e-muhabbat kā ḳhulūs

dushmanoñ ke liye bhī un kā salām aaya hai

jo bhī mil jaa.e vo saaqī kī 'ināyat kahiye

ye bhī kyā kam hai ki durd-e-tah-e-jām aaya hai

aap kyoñ chalte zamāne kī ravish se haT kar

vaqt paḌne pe kisī ke koī kaam aaya hai

Darte Darte tirī rahmat kā sahārā le kar

tere darbār meñ maulā ye ġhulām aaya hai

ai 'zakī' hashr meñ rahmat kī nazar hai mujh par

dil-e-tarsīda baḌe vaqt pe kaam aaya hai

KHud hi mahbub liye apna payam aaya hai

manzil-e-ishq mein aisa bhi maqam aaya hai

koi KHat aaya hai un ka na payam aaya hai

dida-e-dil ke liye saKHt maqam aaya hai

dekhiye kaise kaTe raat paDi hai sari

phir tasawwur mein koi ab sar-e-sham aaya hai

aap apni bhi KHabar ab nahin milti ai dost

wadi-e-‘ishq mein kaisa ye maqam aaya hai

hae kya chiz hai ye ahl-e-muhabbat ka KHulus

dushmanon ke liye bhi un ka salam aaya hai

jo bhi mil jae wo saqi ki 'inayat kahiye

ye bhi kya kam hai ki durd-e-tah-e-jam aaya hai

aap kyon chalte zamane ki rawish se haT kar

waqt paDne pe kisi ke koi kaam aaya hai

Darte Darte teri rahmat ka sahaara le kar

tere darbar mein maula ye ghulam aaya hai

ai 'zaki' hashr mein rahmat ki nazar hai mujh par

dil-e-tarsida baDe waqt pe kaam aaya hai