KHud hi ye dard-e-sar qubul kiya

ḳhud hī ye dard-e-sar qubūl kiyā

har azāb-e-safar qubūl kiyā

kaun hai jis kī khoj meñ ham ne

ghūmnā dar-ba-dar qubūl kiyā

na to maiñ hī kahūñ na dil merā

kis ne kis kā asar qubūl kiyā

ghūmnā kūcha-e-malāmat meñ

ham ne kyā soch kar qubūl kiyā

ham ne do din kī zindagī ke liye

kitnā lambā safar qubūl kiyā

ma.anī-e-zīst hī badal deñge

ham ne jiinā agar qubūl kiyā

diid kī chaah meñ in āñkhoñ ne

har fareb-e-nazar qubūl kiyā

is ibādat ke farz ko 'rāhat'

man nahīñ thā magar qubūl kiyā

KHud hi ye dard-e-sar qubul kiya

har azab-e-safar qubul kiya

kaun hai jis ki khoj mein hum ne

ghumna dar-ba-dar qubul kiya

na to main hi kahun na dil mera

kis ne kis ka asar qubul kiya

ghumna kucha-e-malamat mein

hum ne kya soch kar qubul kiya

hum ne do din ki zindagi ke liye

kitna lamba safar qubul kiya

mani-e-zist hi badal denge

hum ne jina agar qubul kiya

did ki chah mein in aankhon ne

har fareb-e-nazar qubul kiya

is ibaadat ke farz ko 'rahat'

man nahin tha magar qubul kiya