خود کو بدن کی قید سے آزاد کر گیا

خود کو بدن کی قید سے آزاد کر گیا

مٹی کا ایک ڈھیر تھا پل میں بکھر گیا

عرصہ ہوا کہ دھوپ کا شوق سفر گیا

مدت ہوئی وہ جذبۂ وحشت اثر گیا

وہ منزل مراد کو اپنی نہ پا سکا

لمحوں کے اضطراب سے جو شخص ڈر گیا

وہ تندیٔ سخن تھی کہ ٹوٹا حصار جسم

لہجے کا زہر روح کے اندر اتر گیا

داد جنوں ملی ترے کوچے میں سنگ سے

آیا تھا خالی ہاتھ لیے زخم سر گیا

اس نے تو مجھ کو ٹوٹ کے چاہا تھا دوستو

لیکن میں سنگ ہائے زمانہ سے ڈر گیا

یہ سانحہ تو کوئی بڑا سانحہ نہیں

جو سانحہ بڑا تھا وہ دل پر گزر گیا

گھر چھوڑ کر جو دشت جنوں کا ہوا عظیمؔ

پھر دشت سے نہ لوٹ کے میں اپنے گھر گیا