KHud ko badan ki qaid se aazad kar gaya

ḳhud ko badan kī qaid se āzād kar gayā

miTTī kā ek Dher thā pal meñ bikhar gayā

'arsa huā ki dhuup kā shauq-e-safar gayā

muddat huī vo jazba-e-vahshat-asar gayā

vo manzil-e-murād ko apnī na pā sakā

lamhoñ ke iztirāb se jo shaḳhs Dar gayā

vo tundī-e-suḳhan thī ki TuuTā hisār-e-jism

lahje kā zahr ruuh ke andar utar gayā

dād-e-junūñ milī tire kūche meñ sang se

aayā thā ḳhālī haath liye zaḳhm-e-sar gayā

us ne to mujh ko Tuut ke chāhā thā dosto

lekin maiñ sang-hā-e-zamāna se Dar gayā

ye sāniha to koī baḌā sāniha nahīñ

jo sāniha baḌā thā vo dil par guzar gayā

ghar chhoḌ kar jo dasht-e-junūñ kā huā 'azīm'

phir dasht se na lauT ke maiñ apne ghar gayā

KHud ko badan ki qaid se aazad kar gaya

miTTi ka ek Dher tha pal mein bikhar gaya

'arsa hua ki dhup ka shauq-e-safar gaya

muddat hui wo jazba-e-wahshat-asar gaya

wo manzil-e-murad ko apni na pa saka

lamhon ke iztirab se jo shaKHs Dar gaya

wo tundi-e-suKHan thi ki TuTa hisar-e-jism

lahje ka zahr ruh ke andar utar gaya

dad-e-junun mili tere kuche mein sang se

aaya tha KHali hath liye zaKHm-e-sar gaya

us ne to mujh ko Tut ke chaha tha dosto

lekin main sang-ha-e-zamana se Dar gaya

ye saniha to koi baDa saniha nahin

jo saniha baDa tha wo dil par guzar gaya

ghar chhoD kar jo dasht-e-junun ka hua 'azim'

phir dasht se na lauT ke main apne ghar gaya