KHud ko bhula ke hum unhen DhunDen magar kahan

ḳhud ko bhulā ke ham unheñ DhūñDeñ magar kahāñ

un kī nazar nazar hai hamārī nazar kahāñ

jaa.eñ tirī talāsh meñ shorīda-sar kahāñ

rahte haiñ apne haal se vo bā-ḳhabar kahāñ

āñchal kī sarsarāhaTeñ naġhma-navāz haiñ

saath un ke jā rahī hai nasīm-e-sahar kahāñ

bargashta aap kyā haiñ zamāna bhī hai ḳhilāf

ab ham guzāreñ zindagī-e-muḳhtasar kahāñ

misl-e-ġhubār rāh-e-talab ustuvār kar

sīkhā hai uḌtī ḳhaak ne azm-e-safar kahāñ

un mast-añkhḌiyoñ ke tasavvur meñ kho ga.e

ḳhud apne hosh meñ haiñ mire chārāgar kahāñ

pahlī sī rasm-o-rāh 'shabānā' nahīñ rahī

ham miT ga.e magar unheñ is kī ḳhabar kahāñ

KHud ko bhula ke hum unhen DhunDen magar kahan

un ki nazar nazar hai hamari nazar kahan

jaen teri talash mein shorida-sar kahan

rahte hain apne haal se wo ba-KHabar kahan

aanchal ki sarsarahaTen naghma-nawaz hain

sath un ke ja rahi hai nasim-e-sahar kahan

bargashta aap kya hain zamana bhi hai KHilaf

ab hum guzaren zindagi-e-muKHtasar kahan

misl-e-ghubar rah-e-talab ustuwar kar

sikha hai uDti KHak ne azm-e-safar kahan

un mast-ankhDiyon ke tasawwur mein kho gae

KHud apne hosh mein hain mere chaaragar kahan

pahli si rasm-o-rah 'shabana' nahin rahi

hum miT gae magar unhen is ki KHabar kahan