KHud ko itna bhi pasheman nahin karna tha

ḳhud ko itnā bhī pashemān nahīñ karnā thā

chand lamhoñ ko dil-o-jān nahīñ karnā thā

terī ḳhvāhish bhī na ho tujh se shikāyat bhī na ho

itnā ehsān mirī jaan nahīñ karnā thā

phir to honā hī thā ai 'ishq tamāshā-e-junūñ

hosh vāloñ ko nigahbān nahīñ karnā thā

itnī duurī thī to duurī kā bharam bhī rakhte

merī āñkhoñ ko shabistān nahīñ karnā thā

dar pe baiThe haiñ savālī ki ijāzat pāveñ

tum ko tāḳhīr kā sāmān nahīñ karnā thā

ham havāoñ se sadā bar-sar-e-paikār rahe

ab ye lagtā hai charāġhān nahīñ karnā thā

ek ummīd ke saa.e meñ guzārī 'ahmar'

is qadar 'umr pe ehsān nahīñ karnā thā

KHud ko itna bhi pasheman nahin karna tha

chand lamhon ko dil-o-jaan nahin karna tha

teri KHwahish bhi na ho tujh se shikayat bhi na ho

itna ehsan meri jaan nahin karna tha

phir to hona hi tha ai 'ishq tamasha-e-junun

hosh walon ko nigahban nahin karna tha

itni duri thi to duri ka bharam bhi rakhte

meri aankhon ko shabistan nahin karna tha

dar pe baiThe hain sawali ki ijazat pawen

tum ko taKHir ka saman nahin karna tha

hum hawaon se sada bar-sar-e-paikar rahe

ab ye lagta hai charaghan nahin karna tha

ek ummid ke sae mein guzari 'ahmar'

is qadar 'umr pe ehsan nahin karna tha