KHud ko KHudi ka aaina dikhla raha hun main

ḳhud ko ḳhudī kā aa.ina dikhlā rahā huuñ maiñ

apnā harīf aap banā jā rahā huuñ maiñ

qismat kī pastiyoñ kī hadeñ ḳhatm ho chukīñ

ab rif.atoñ kī samt uḌā jā rahā huuñ maiñ

nākām-e-ārzū huuñ magar uf yaqīn-e-ishq

dānista phir fareb-e-vafā khā rahā huuñ

mohar-e-sukūt-e-lab pe hai bahke hue qadam

ai be-ḳhudī phir aaj kidhar jā rahā huuñ maiñ

phir dekhtā huuñ chehra-e-māzī ke ḳhadd-o-ḳhāl

saaqī sambhāl hosh meñ phir aa rahā huuñ maiñ

ruk jaa.e jis ke shor se dasht-o-jabal kī saañs

us sail-e-ranj-o-ġham meñ bahā jā rahā huuñ maiñ

jaane ko huuñ ahāta-e-ālam se dūr-tar

bas chand roz tum ko nazar aa rahā huuñ maiñ

shams-o-qamar haiñ raah meñ zarrāt kī tarah

kis kī tajalliyoñ meñ ghirā jā rahā huuñ maiñ

thā jo ḳhayāl terī jafāoñ se peshtar

dil ko usī ḳhayāl se bahlā rahā huuñ maiñ

baḌh baḌh ke 'raaj mere qadam le rahī hai maut

kis zindagī kī samt baḌhā jā rahā huuñ maiñ

KHud ko KHudi ka aaina dikhla raha hun main

apna harif aap bana ja raha hun main

qismat ki pastiyon ki haden KHatm ho chukin

ab rifaton ki samt uDa ja raha hun main

nakaam-e-arzu hun magar uf yaqin-e-ishq

danista phir fareb-e-wafa kha raha hun

mohar-e-sukut-e-lab pe hai bahke hue qadam

ai be-KHudi phir aaj kidhar ja raha hun main

phir dekhta hun chehra-e-mazi ke KHadd-o-KHal

saqi sambhaal hosh mein phir aa raha hun main

ruk jae jis ke shor se dasht-o-jabal ki sans

us sail-e-ranj-o-gham mein baha ja raha hun main

jaane ko hun ahata-e-alam se dur-tar

bas chand roz tum ko nazar aa raha hun main

shams-o-qamar hain rah mein zarraat ki tarah

kis ki tajalliyon mein ghira ja raha hun main

tha jo KHayal teri jafaon se peshtar

dil ko usi KHayal se bahla raha hun main

baDh baDh ke 'raj mere qadam le rahi hai maut

kis zindagi ki samt baDha ja raha hun main