KHud ko majnun kabhi farhad kiya hai maine

ḳhud ko majnūñ kabhī farhād kiyā hai maiñ ne

vaqt apnā baḌā barbād kiyā hai maiñ ne

kaam ye bhī mire sayyād kiyā hai maiñ ne

ḳhauf dil se tirā āzād kiyā hai maiñ ne

ek patthar-sifat insāñ se mohabbat kar ke

ai ġham-e-dil tujhe ījād kiyā hai maiñ ne

shāḳh-e-dil par tirī yādoñ kā baserā kyoñ hai

in parindoñ ko to āzād kiyā hai maiñ ne

yuuñ khilāyā hai tire dil meñ mohabbat kā gulāb

dasht jaise koī ābād kiyā hai maiñ ne

ik ibādat se kahāñ kam hai mohabbat merī

tujh ko aayat kī tarah yaad kiyā hai maiñ ne

tujh ko duniyā ke tamāshoñ se bachāne ke liye

jaane kyā kyā mirī aulād kiyā hai maiñ ne

hukmrānī pe jise naaz bahut thā 'ḳhālid'

us ko āmāda-e-fariyād kiyā hai maiñ ne

KHud ko majnun kabhi farhad kiya hai main ne

waqt apna baDa barbaad kiya hai main ne

kaam ye bhi mere sayyaad kiya hai main ne

KHauf dil se tera aazad kiya hai main ne

ek patthar-sifat insan se mohabbat kar ke

ai gham-e-dil tujhe ijad kiya hai main ne

shaKH-e-dil par teri yaadon ka basera kyon hai

in parindon ko to aazad kiya hai main ne

yun khilaya hai tere dil mein mohabbat ka gulab

dasht jaise koi aabaad kiya hai main ne

ek ibaadat se kahan kam hai mohabbat meri

tujh ko aayat ki tarah yaad kiya hai main ne

tujh ko duniya ke tamashon se bachane ke liye

jaane kya kya meri aulad kiya hai main ne

hukmrani pe jise naz bahut tha 'KHalid'

us ko aamada-e-fariyaad kiya hai main ne