KHud ko pa-basta-e-zanjir kiye ja chup-chap

ḳhud ko pā-basta-e-zanjīr kiye jā chup-chāp

ḳhvāb sharminda-e-ta.abīr kiye jā chup-chāp

ḳhāma-e-ranj-o-alam se ruḳh-e-kam-mā.egī par

nusrat-e-jāvedāñ tahrīr kiye jā chup-chāp

ye amal bā.is-e-taskīn-e-junūñ bhī hogā

jazba-e-ishq kī ta.amīr kiye jā chup-chāp

ġham-e-daurāñ kī aziyyat bhī to dil sahtā hai

ġham-e-jānāñ ko bhī jāgīr kiye jā chup-chāp

zaḳhm gahre to ba-zid shauq mire kartā rahā

us masīhā.ī kī tadbīr kiye jā chup-chāp

maqsad-e-zindagī khultā hī chalā jā.egā

apne dil meñ use tasvīr kiye jā chup-chāp

shā.irī se hai 'ḳhayāl' us ko shaġhaf sheroñ meñ

apne jazbāt ko tasḳhīr kiye jā chup-chāp

KHud ko pa-basta-e-zanjir kiye ja chup-chap

KHwab sharminda-e-tabir kiye ja chup-chap

KHama-e-ranj-o-alam se ruKH-e-kam-maegi par

nusrat-e-jawedan tahrir kiye ja chup-chap

ye amal bais-e-taskin-e-junun bhi hoga

jazba-e-ishq ki tamir kiye ja chup-chap

gham-e-dauran ki aziyyat bhi to dil sahta hai

gham-e-jaanan ko bhi jagir kiye ja chup-chap

zaKHm gahre to ba-zid shauq mere karta raha

us masihai ki tadbir kiye ja chup-chap

maqsad-e-zindagi khulta hi chala jaega

apne dil mein use taswir kiye ja chup-chap

shairi se hai 'KHayal' us ko shaghaf sheron mein

apne jazbaat ko tasKHir kiye ja chup-chap