KHud ko pane ki hum koshishon mein rahe

ḳhud ko paane kī ham koshishoñ meñ rahe

zindagī ke na.e tajraboñ meñ rahe

rishta-e-dard ke dā.eroñ meñ rahe

dostoñ kī tarah dushmanoñ meñ rahe

jo badalte rahe haiñ zamāne kā ruḳh

hādsoñ meñ pale hādsoñ meñ rahe

ham na.ī shā'irī kī baqā ke liye

fikr ke munfarid zāviyoñ meñ rahe

ham anā kī hifāzat kī ḳhātir sadā

apne ehsās kī sarhadoñ meñ rahe

kaisī kaisī umīdeñ lahū ho ga.iiñ

mubtalā jo ġhalat-fahmiyoñ meñ rahe

vaqt kī sāzishoñ se rahe bā-ḳhabar

vo abābīl jo maqbaroñ meñ rahe

amn-e-'ālam meñ vo Dālte haiñ ḳhalal

ho ke mā'tūb jo jangaloñ meñ rahe

KHud ko pane ki hum koshishon mein rahe

zindagi ke nae tajrabon mein rahe

rishta-e-dard ke daeron mein rahe

doston ki tarah dushmanon mein rahe

jo badalte rahe hain zamane ka ruKH

hadson mein pale hadson mein rahe

hum nai sha'iri ki baqa ke liye

fikr ke munfarid zawiyon mein rahe

hum ana ki hifazat ki KHatir sada

apne ehsas ki sarhadon mein rahe

kaisi kaisi umiden lahu ho gain

mubtala jo ghalat-fahmiyon mein rahe

waqt ki sazishon se rahe ba-KHabar

wo ababil jo maqbaron mein rahe

amn-e-'alam mein wo Dalte hain KHalal

ho ke ma'tub jo jangalon mein rahe