KHud ko sharar shumar kiya aur jal bujhe

ḳhud ko sharar shumār kiyā aur jal bujhe

ik shola-ruḳh se pyaar kiyā aur jal bujhe

ik raat meñ simaT ga.ī kul umr-e-ārzū

ik umr intizār kiyā aur jal bujhe

pichhle janam kī raakh se le kar nayā janam

phir raakh ko sharār kiyā aur jal bujhe

ham bhī nasīb se jo sitāra-nasīb the

sūraj kā intizār kiyā aur jal bujhe

ham raushni-e-tabā se shola-faroz the

har tīrgī pe vaar kiyā aur jal bujhe

KHud ko sharar shumar kiya aur jal bujhe

ek shola-ruKH se pyar kiya aur jal bujhe

ek raat mein simaT gai kul umr-e-arzu

ek umr intizar kiya aur jal bujhe

pichhle janam ki rakh se le kar naya janam

phir rakh ko sharar kiya aur jal bujhe

hum bhi nasib se jo sitara-nasib the

suraj ka intizar kiya aur jal bujhe

hum raushni-e-taba se shola-faroz the

har tirgi pe war kiya aur jal bujhe