KHud ko tanhai mein ghairon ki nazar se dekho

ḳhud ko tanhā.ī meñ ġhairoñ kī nazar se dekho

apnā ghar duur bhī ho kar kabhī ghar se dekho

maañd paḌ jā.eñge ik roz ye chehre ke nuqūsh

aa.ina dekho to ibrat kī nazar se dekho

achchhī nazroñ kā to hotā hai asar bhī achchhā

aib dekho jo kisī kā to hunar se dekho

kitnī kāvish se jilā de ke sañvārā hogā

aa.ine ko nigah-e-ā.ina-gar se dekho

koī pahlū bhī samajh meñ nahīñ aatā us kā

zindagī ek muamma hai jidhar se dekho

ḳhush na ho dekh ke dushman pe bhī aafat kī ghaTā

sar pe apne na kahīñ TuuT ke barse dekho

ye ġhalat hai ki nahīñ hai koī sunñe vaalā

kitnī mahrūm hai fariyād asar se dekho

kyā kaheñ phir koī sīñchī ga.ī maqtal kī zamīñ

bū-e-ḳhūñ le ke sabā aa.ī kidhar se dekho

har shab-e-tār ke dāman meñ ujāle bhar do

har añdhere ko charāġhoñ kī nazar se dekho

daaġh hī daaġh ho aisā to nahīñ hai 'nātiq'

aadmī saaf jidhar se ho udhar se dekho

KHud ko tanhai mein ghairon ki nazar se dekho

apna ghar dur bhi ho kar kabhi ghar se dekho

mand paD jaenge ek roz ye chehre ke nuqush

aaina dekho to ibrat ki nazar se dekho

achchhi nazron ka to hota hai asar bhi achchha

aib dekho jo kisi ka to hunar se dekho

kitni kawish se jila de ke sanwara hoga

aaine ko nigah-e-aina-gar se dekho

koi pahlu bhi samajh mein nahin aata us ka

zindagi ek muamma hai jidhar se dekho

KHush na ho dekh ke dushman pe bhi aafat ki ghaTa

sar pe apne na kahin TuT ke barse dekho

ye ghalat hai ki nahin hai koi sunne wala

kitni mahrum hai fariyaad asar se dekho

kya kahen phir koi sinchi gai maqtal ki zamin

bu-e-KHun le ke saba aai kidhar se dekho

har shab-e-tar ke daman mein ujale bhar do

har andhere ko charaghon ki nazar se dekho

dagh hi dagh ho aisa to nahin hai 'natiq'

aadmi saf jidhar se ho udhar se dekho