KHud koi chaak-gareban hai rag-e-jaan ke qarib

ḳhud koī chāk-garebāñ hai rag-e-jāñ ke qarīb

ai junūñ hashr kā sāmāñ hai rag-e-jāñ ke qarīb

manzil-e-dil se to guzre hue din biit ga.e

kārvān-e-ġham-e-jānāñ hai rag-e-jāñ ke qarīb

dar-ba-dar kis liye āvāra ho sar-gashta ho

dosto kūcha-e-jānāñ hai rag-e-jāñ ke qarīb

kyā kaheñ ab dil-e-betāb kā aalam yaaro

muztarib jaise rag-e-jāñ hai rag-e-jāñ ke qarīb

kyuuñ na kāñToñ kī taraf jaa.eñ tire dīvāne

ḳhalish-e-jumbish-e-mizhgāñ hai rag-e-jāñ ke qarīb

shabnam-e-ashk girā detā hai zaḳhm-e-jāñ par

koī hamdard sā insāñ hai rag-e-jāñ ke qarīb

kis ke gaa.e hue naġhmāt sunātā huuñ 'shamīm'

kaun hai vo jo ġhazal-ḳhvāñ hai rag-e-jāñ ke qarīb

KHud koi chaak-gareban hai rag-e-jaan ke qarib

ai junun hashr ka saman hai rag-e-jaan ke qarib

manzil-e-dil se to guzre hue din bit gae

karwan-e-gham-e-jaanan hai rag-e-jaan ke qarib

dar-ba-dar kis liye aawara ho sar-gashta ho

dosto kucha-e-jaanan hai rag-e-jaan ke qarib

kya kahen ab dil-e-betab ka aalam yaro

muztarib jaise rag-e-jaan hai rag-e-jaan ke qarib

kyun na kanTon ki taraf jaen tere diwane

KHalish-e-jumbish-e-mizhgan hai rag-e-jaan ke qarib

shabnam-e-ashk gira deta hai zaKHm-e-jaan par

koi hamdard sa insan hai rag-e-jaan ke qarib

kis ke gae hue naghmat sunata hun 'shamim'

kaun hai wo jo ghazal-KHwan hai rag-e-jaan ke qarib