KHud main dhuni ramae baiThi hun

ḳhud maiñ dhūnī ramā.e baiThī huuñ

aaj ḳhud ko bhulā.e baiThī huuñ

jaane vāloñ kā intizār nahīñ

apne raste meñ aa.e baiThī huuñ

us kī āñkhoñ meñ hai tilism koī

apnā chehra luTā.e baiThī huuñ

chāñd ko taish aa rahā hai ki maiñ

kyuuñ nazar ko milā.e baiThī huuñ

phuul khilte haiñ mujh meñ sheroñ ke

ek misra samā.e baiThī huuñ

rāhguzar ehtirām kar merā

maiñ kisī ke bulā.e baiThī huuñ

har ḳhushī zard ho ga.ī jaise

ik aziyyat bhulā.e baiThī huuñ

aa.ine par to hai bharosā mujhe

us se kyuuñ muñh chhupā.e baiThī huuñ

chubh rahī hai añdherī raat mujhe

har sitāra bujhā.e baiThī huuñ

KHud main dhuni ramae baiThi hun

aaj KHud ko bhulae baiThi hun

jaane walon ka intizar nahin

apne raste mein aae baiThi hun

us ki aankhon mein hai tilism koi

apna chehra luTae baiThi hun

chand ko taish aa raha hai ki main

kyun nazar ko milae baiThi hun

phul khilte hain mujh mein sheron ke

ek misra samae baiThi hun

rahguzar ehtiram kar mera

main kisi ke bulae baiThi hun

har KHushi zard ho gai jaise

ek aziyyat bhulae baiThi hun

aaine par to hai bharosa mujhe

us se kyun munh chhupae baiThi hun

chubh rahi hai andheri raat mujhe

har sitara bujhae baiThi hun