KHud mazedar tabiat hai to saman kaisa

ḳhud mazedār tabī.at hai to sāmāñ kaisā

zaḳhm-e-dil aap haiñ shorish pe namak-dāñ kaisā

haath vahshat meñ na poñchhe to garebāñ kaisā

ḳhār-e-sahrā se na uljhe to vo dāmāñ kaisā

kūcha-e-yār ko da.avā hai ki jannat maiñ huuñ

ḳhuld kahte haiñ kise rauza-e-rizvāñ kaisā

usī ma.abūd kā hai dair-o-haram meñ jalva

bahs kis baat kī hai gabr o musalmāñ kaisā

va.ada-e-bāda-e-at.har kā bharosa kab tak

chal ke bhaTTī pe piyeñ jur.a-e-irfāñ kaisā

ham hue 'qais' hue 'vāmiq' o 'farhād' hue

zulf-e-pur-ḳham ne kiyā sab ko pareshāñ kaisā

duur ke Dhol haiñ yūsuf kī kahānī sāhab

kis ko ma.alūm hai hogā mah-e-kan.āñ kaisā

tere qurbān maiñ itnā to batā de qātil

merī gardan pe chalā ḳhanjar-e-burrāñ kaisā

dil ke ā.īne meñ tasvīr-e-sanam rakhtā hai

nahīñ ma.alūm ki 'āġhā' hai musalmāñ kaisā

KHud mazedar tabiat hai to saman kaisa

zaKHm-e-dil aap hain shorish pe namak-dan kaisa

hath wahshat mein na ponchhe to gareban kaisa

KHar-e-sahra se na uljhe to wo daman kaisa

kucha-e-yar ko dawa hai ki jannat main hun

KHuld kahte hain kise rauza-e-rizwan kaisa

usi mabud ka hai dair-o-haram mein jalwa

bahs kis baat ki hai gabr o musalman kaisa

wada-e-baada-e-athar ka bharosa kab tak

chal ke bhaTTi pe piyen jura-e-irfan kaisa

hum hue 'qais' hue 'wamiq' o 'farhad' hue

zulf-e-pur-KHam ne kiya sab ko pareshan kaisa

dur ke Dhol hain yusuf ki kahani sahab

kis ko malum hai hoga mah-e-kanan kaisa

tere qurban main itna to bata de qatil

meri gardan pe chala KHanjar-e-burran kaisa

dil ke aaine mein taswir-e-sanam rakhta hai

nahin malum ki 'agha' hai musalman kaisa