KHud miT ke mohabbat ki taswir banai hai

ḳhud miT ke mohabbat kī tasvīr banā.ī hai

ik sham.a jalā.ī hai ik sham.a bujhā.ī hai

āġhāz-e-shab-e-ġham hai kyuuñ sone lage taare

shāyad mirī āñkhoñ se kuchh niind churā.ī hai

maiñ ḳhud bhī tapish jis kī sahte hue Dartā huuñ

aksar mire naġhmoñ ne vo aag lagā.ī hai

jab yaad tum aate ho mahsūs ye hotā hai

shīshe meñ parī jaise koī utar aa.ī hai

har-chand samajhtā thā jhūTe haiñ tire vaade

lekin tire vādoñ ne kyā raah dikhā.ī hai

jo kuchh bhī samajh le ab marzī hai zamāne kī

shīshe kī kahānī hai patthar ne sunā.ī hai

maanā ki mohabbat hī buniyād hai hastī kī

'naushād' magar tujh ko ye raas kab aa.ī hai

KHud miT ke mohabbat ki taswir banai hai

ek shama jalai hai ek shama bujhai hai

aaghaz-e-shab-e-gham hai kyun sone lage tare

shayad meri aankhon se kuchh nind churai hai

main KHud bhi tapish jis ki sahte hue Darta hun

aksar mere naghmon ne wo aag lagai hai

jab yaad tum aate ho mahsus ye hota hai

shishe mein pari jaise koi utar aai hai

har-chand samajhta tha jhuTe hain tere wade

lekin tere wadon ne kya rah dikhai hai

jo kuchh bhi samajh le ab marzi hai zamane ki

shishe ki kahani hai patthar ne sunai hai

mana ki mohabbat hi buniyaad hai hasti ki

'naushad' magar tujh ko ye ras kab aai hai