KHud mujhko mere dast-e-kaman-gir se mila

ḳhud mujh ko mere dast-e-kamāñ-gīr se milā

jo zaḳhm bhī milā hai usī tiir se milā

tujh ko ḳhabar bhī hai mire inkār kā javāb

teġh-o-sinān-o-ḳhanjar-o-shamshīr se milā

gum ho gayā thā maiñ kahīñ dasht-e-vajūd meñ

maiñ apne ism-e-zāt kī tasḳhīr se milā

milne kī kuchh ḳhushī na bichhaḌne kā ḳhauf hai

ai merī jaan tū baḌī tāḳhīr se milā

ai ramz-e-āgahī maiñ tujhe ḳhud pe vā karūñ

vahshat ko mere paañv kī zanjīr se milā

dariyā tamām tishna laboñ kī hai milkiyat

is mumlikat ko pyaas kī jāgīr se milā

jo ḳhvāb merī chashm-e-zarūrat ne kho diyā

vo ḳhvāb mere ḳhvāb kī tā'bīr se milā

'shāhid' mire mizāj kī āshuftagī na dekh

merī udāsiyoñ kā nasab 'mīr' se milā

KHud mujh ko mere dast-e-kaman-gir se mila

jo zaKHm bhi mila hai usi tir se mila

tujh ko KHabar bhi hai mere inkar ka jawab

tegh-o-sinan-o-KHanjar-o-shamshir se mila

gum ho gaya tha main kahin dasht-e-wajud mein

main apne ism-e-zat ki tasKHir se mila

milne ki kuchh KHushi na bichhaDne ka KHauf hai

ai meri jaan tu baDi taKHir se mila

ai ramz-e-agahi main tujhe KHud pe wa karun

wahshat ko mere panw ki zanjir se mila

dariya tamam tishna labon ki hai milkiyat

is mumlikat ko pyas ki jagir se mila

jo KHwab meri chashm-e-zarurat ne kho diya

wo KHwab mere KHwab ki ta'bir se mila

'shahid' mere mizaj ki aashuftagi na dekh

meri udasiyon ka nasab 'mir' se mila