KHud nazaron pe nazaron ko hansi aati hai

ḳhud nazāroñ pe nazāroñ ko hañsī aatī hai

bāġhbānoñ pe bahāroñ ko hañsī aatī hai

ab ye kyuuñ zikr-e-bahārāñ pe chaman meñ aksar

phuul to phuul haiñ ḳhāroñ ko hañsī aatī hai

mehr-o-iḳhlās kī duniyā meñ ye kyā baat huī

aaj yāroñ hī pe yāroñ ko hañsī aatī hai

aisī be-jān sī hai mere harīfoñ kī hañsī

jaise tūfāñ pe kināroñ ko hañsī aatī hai

kyā kare aah vo bechāra musāfir jis par

aap kī rāh-guzāroñ ko hañsī aatī hai

koī jab chāñd sitāroñ se ho masrūf-e-suḳhan

kis qadar chāñd sitāroñ ko hañsī aatī hai

ḳhair ho ḳhair mashiyyat ke irādoñ kī qasam

aaj taqdīr ke māroñ ko hañsī aatī hai

haa.e kis moḌ pe aayā hai ab afsāna-e-ġham

mere afsāna-nigāroñ ko hañsī aatī hai

ham haiñ mahrūm-e-masarrat to koī baat nahīñ

ye bhī kyā kam hai sahāroñ ko hañsī aatī hai

gardish-e-vaqt ne kyā phir koī sūrat badlī

yā yūñhī vaqt-guzāroñ ko hañsī aatī hai

shāyad 'aḳhgar' hī kī tauba kī ḳhabar hai yaaro

aaj saaqī ke ishāroñ ko hañsī aatī hai

KHud nazaron pe nazaron ko hansi aati hai

baghbanon pe bahaaron ko hansi aati hai

ab ye kyun zikr-e-bahaaran pe chaman mein aksar

phul to phul hain KHaron ko hansi aati hai

mehr-o-iKHlas ki duniya mein ye kya baat hui

aaj yaron hi pe yaron ko hansi aati hai

aisi be-jaan si hai mere harifon ki hansi

jaise tufan pe kinaron ko hansi aati hai

kya kare aah wo bechaara musafir jis par

aap ki rah-guzaron ko hansi aati hai

koi jab chand sitaron se ho masruf-e-suKHan

kis qadar chand sitaron ko hansi aati hai

KHair ho KHair mashiyyat ke iradon ki qasam

aaj taqdir ke maron ko hansi aati hai

hae kis moD pe aaya hai ab afsana-e-gham

mere afsana-nigaron ko hansi aati hai

hum hain mahrum-e-masarrat to koi baat nahin

ye bhi kya kam hai sahaaron ko hansi aati hai

gardish-e-waqt ne kya phir koi surat badli

ya yunhi waqt-guzaron ko hansi aati hai

shayad 'aKHgar' hi ki tauba ki KHabar hai yaro

aaj saqi ke ishaaron ko hansi aati hai