KHud-nigar the aur mahw-e-did-e-husn-e-yar the

ḳhud-nigar the aur mahv-e-dīd-e-husn-e-yār the

ham ki apne rū-ba-rū shīsha kī ik dīvār the

phir nigāhoñ ne bune the chaar sū ḳhvāboñ ke jaal

sū-ba-sū phir rishta-gar vahm-o-gumāñ ke taar the

muḳhtasar sā hai hamārā qissa-e-shauq-e-safar

abr-e-āvāra the ham lekin sar-e-kohsār the

ḳhanda-rez o girya-gīñ thī zaḳhm-e-ḳhātir kī numūd

duur duniyā ke ta.ayyun se mire āzār the

maiñ savād-e-dasht-e-tanhā.ī kā phaltā peḌ thā

sabz zahr-e-be-kasī se mere barg-o-bār the

bujh gayā thā dil hamārā ba.ad-e-sharh-e-ārzū

jī kī ham kahne ga.e to kushta-e-izhār the

rā.egāñ thī apnī āb-o-tāb bhī kyā kyā 'razī'

ham ki ik be-ma.arka aur be-adū talvār the

KHud-nigar the aur mahw-e-did-e-husn-e-yar the

hum ki apne ru-ba-ru shisha ki ek diwar the

phir nigahon ne bune the chaar su KHwabon ke jal

su-ba-su phir rishta-gar wahm-o-guman ke tar the

muKHtasar sa hai hamara qissa-e-shauq-e-safar

abr-e-awara the hum lekin sar-e-kohsar the

KHanda-rez o girya-gin thi zaKHm-e-KHatir ki numud

dur duniya ke tayyun se mere aazar the

main sawad-e-dasht-e-tanhai ka phalta peD tha

sabz zahr-e-be-kasi se mere barg-o-bar the

bujh gaya tha dil hamara baad-e-sharh-e-arzu

ji ki hum kahne gae to kushta-e-izhaar the

raegan thi apni aab-o-tab bhi kya kya 'razi'

hum ki ek be-marka aur be-adu talwar the