KHud rah ke mushkilat mein hal de diya use

ḳhud rah ke mushkilāt meñ hal de diyā use

maiñ vo shajar ḳhizāñ meñ bhī phal de diyā use

motī luTā.e maiñ ne samundar thā jab talak

ab jhiil ho gayā to kañval de diyā use

pathrāv jis kā sheva dil-āzārī jis kā shauq

munsif ḳhudā hai shīsh-mahal de diyā use

vo ik ġharīb mujh se milā ho gayā amiir

maiñ ik faqīr dars-e-amal de diyā use

puurī huī na shart-e-mohabbat to ḳhvāb meñ

bulvāyā aur tāj-mahal de diyā use

us ne kahā ki husn kī tārīf kījiye

ik sher jo thā husn-e-ġhazal de diyā use

ab tā-abad usī kī hukūmat meñ hai jahāñ

sab kuchh ḳhudā ne roz-e-azal de diyā use

'shaidā' bahut ḳhalīq hai kahte haiñ saare log

rab ne mohabbatoñ kā badal de diyā use

KHud rah ke mushkilat mein hal de diya use

main wo shajar KHizan mein bhi phal de diya use

moti luTae main ne samundar tha jab talak

ab jhil ho gaya to kanwal de diya use

pathraw jis ka shewa dil-azari jis ka shauq

munsif KHuda hai shish-mahal de diya use

wo ek gharib mujh se mila ho gaya amir

main ek faqir dars-e-amal de diya use

puri hui na shart-e-mohabbat to KHwab mein

bulwaya aur taj-mahal de diya use

us ne kaha ki husn ki tarif kijiye

ek sher jo tha husn-e-ghazal de diya use

ab ta-abad usi ki hukumat mein hai jahan

sab kuchh KHuda ne roz-e-azal de diya use

'shaida' bahut KHaliq hai kahte hain sare log

rab ne mohabbaton ka badal de diya use