KHud se hi Dar rahe hain bahut din KHarab hain

ḳhud se hī Dar rahe haiñ bahut din ḳharāb haiñ

ye kaise vasvase haiñ bahut din ḳharāb haiñ

ḳhatroñ meñ paḌ ga.ī hai parindoñ kī zindagī

jangal ujaḌ chuke haiñ bahut din ḳharāb haiñ

jin ke baġhair jiinā mujhe aa gayā thā vo

siine se aa lage haiñ bahut din ḳharāb haiñ

kyā kyā bayān kar gayā ḳhat aap kā janāb

aañsū nikal paḌe haiñ bahut din ḳharāb haiñ

manzil qarīb ho ke bhī hāsil nahīñ hameñ

yāroñ ke qāfile haiñ bahut din ḳharāb haiñ

ab ḳhud-kushī ke raste se aatā nahīñ koī

sab sach meñ mar rahe haiñ bahut din ḳharāb haiñ

ġhairoñ se mil ke zaḳhm hare ho ga.e haiñ yaar

apne bichhaḌ chuke haiñ bahut din ḳharāb haiñ

kitne hī be-qusūr sar-e-dār chaḌh ga.e

sarkār ke maze haiñ bahut din ḳharāb haiñ

apnoñ ke haath aa ga.e tīr-o-kamān aur

apne hī sāmne haiñ bahut din ḳharāb haiñ

aish-o-tarab ke saath haiñ kuchh ġham bhī aur sharīk

ye kaise marhale haiñ bahut din ḳharāb haiñ

kūcha-e-dil-barāñ meñ bhī 'sohil' janāb aap

āshufta-sar khaḌe haiñ bahut din ḳharāb haiñ

KHud se hi Dar rahe hain bahut din KHarab hain

ye kaise waswase hain bahut din KHarab hain

KHatron mein paD gai hai parindon ki zindagi

jangal ujaD chuke hain bahut din KHarab hain

jin ke baghair jina mujhe aa gaya tha wo

sine se aa lage hain bahut din KHarab hain

kya kya bayan kar gaya KHat aap ka janab

aansu nikal paDe hain bahut din KHarab hain

manzil qarib ho ke bhi hasil nahin hamein

yaron ke qafile hain bahut din KHarab hain

ab KHud-kushi ke raste se aata nahin koi

sab sach mein mar rahe hain bahut din KHarab hain

ghairon se mil ke zaKHm hare ho gae hain yar

apne bichhaD chuke hain bahut din KHarab hain

kitne hi be-qusur sar-e-dar chaDh gae

sarkar ke maze hain bahut din KHarab hain

apnon ke hath aa gae tir-o-kaman aur

apne hi samne hain bahut din KHarab hain

aish-o-tarab ke sath hain kuchh gham bhi aur sharik

ye kaise marhale hain bahut din KHarab hain

kucha-e-dil-baran mein bhi 'sohil' janab aap

aashufta-sar khaDe hain bahut din KHarab hain