KHud se kitna kiya dagha maine

ḳhud se kitnā kiyā daġhā maiñ ne

abhī sīkhī nahīñ vafā maiñ ne

niklā chūhā pahāḌ ko khodā

jo kiyā jo kahā sunā maiñ ne

kholiye kyuuñ dukhoñ ke daftar ko

sochnā band kar diyā maiñ ne

haañ lagāyā hai zikr 'azmat par

zor se ek qahqaha maiñ ne

hāsil-e-zīst hai ki dekhā hai

sumbul-o-sabz-o-sabā maiñ ne

zindagī zahr thā use suqrāt

jur.a jur.a magar piyā maiñ ne

chhup ke baiThā huuñ sharmsārī se

kā'be se duur lī hai jā maiñ ne

ye to tazlīl hai shahādat kī

kabhī māñgā na ḳhūñ-bahā maiñ ne

jab baḌhī aur sharm-e-uryānī

oḌh lī ḳhaak kī qabā maiñ ne

apne dil ko to sī nahīñ saktā

apne hoñToñ ko sī liyā maiñ ne

ḳhauf se bhaag niklā majlis se

jab sunā zikr-e-karbalā maiñ ne

KHud se kitna kiya dagha main ne

abhi sikhi nahin wafa main ne

nikla chuha pahaD ko khoda

jo kiya jo kaha suna main ne

kholiye kyun dukhon ke daftar ko

sochna band kar diya main ne

han lagaya hai zikr 'azmat par

zor se ek qahqaha main ne

hasil-e-zist hai ki dekha hai

sumbul-o-sabz-o-saba main ne

zindagi zahr tha use suqraat

jura jura magar piya main ne

chhup ke baiTha hun sharmsari se

ka'be se dur li hai ja main ne

ye to tazlil hai shahadat ki

kabhi manga na KHun-baha main ne

jab baDhi aur sharm-e-uryani

oDh li KHak ki qaba main ne

apne dil ko to si nahin sakta

apne honTon ko si liya main ne

KHauf se bhag nikla majlis se

jab suna zikr-e-karbala main ne