KHud se milne ke liye bhes badal kar jaana

ḳhud se milne ke liye bhes badal kar jaanā

ā.ina-ḳhāne meñ jaanā to sañbhal kar jaanā

ek parvāne ke jal bujhne kā hāsil ma.alūm

bazm se sham.a kī mānind pighal kar jaanā

merā maqsad thā sañvar jaa.eñ vafā kī rāheñ

varna dushvār na thā raah badal kar jaanā

vādī-e-lams meñ chāho jo mahak sāñsoñ kī

mauj-e-sahbā kī tarah jaam meñ Dhal kar jaanā

nabz-e-kaunain ko dhaḌkan hai amal kī aahaT

maiñ ne us raaz ko sāhil se nikal kar jaanā

dāman-e-faqr meñ saaya hai jahāñgīrī kā

lekin akbar kī tarah dhuup meñ chal kar jaanā

ai 'hayāt' apne hī ehsās ne baḌhne na diyā

kitnā āsān thā girtoñ ko kuchal kar jaanā

KHud se milne ke liye bhes badal kar jaana

aaina-KHane mein jaana to sanbhal kar jaana

ek parwane ke jal bujhne ka hasil malum

bazm se shama ki manind pighal kar jaana

mera maqsad tha sanwar jaen wafa ki rahen

warna dushwar na tha rah badal kar jaana

wadi-e-lams mein chaho jo mahak sanson ki

mauj-e-sahba ki tarah jam mein Dhal kar jaana

nabz-e-kaunain ko dhaDkan hai amal ki aahaT

main ne us raaz ko sahil se nikal kar jaana

daman-e-faqr mein saya hai jahangiri ka

lekin akbar ki tarah dhup mein chal kar jaana

ai 'hayat' apne hi ehsas ne baDhne na diya

kitna aasan tha girton ko kuchal kar jaana