KHud tamasha ban gai chashm-e-tamashai ki bas

ḳhud tamāsha ban ga.ī chashm-e-tamāshā.ī ki bas

sañg-e-dar par aaj kī hai vo jabīñ-sā.ī ki bas

toḌ Daalā maiñ ne āḳhir us kā kaj-aks aa.ina

varna vo yuuñ thā ajab mahv-e-tamāshā.ī ki bas

aisā lagtā hai ki bazm-e-nāz meñ tanhā huuñ maiñ

chashm-e-bīnā ho to hai vo bazm-ārā.ī ki bas

zarre zarre kī zabāñ par naġhma-e-jāñ-soz hai

dasht-zār-e-ġham ne aisī ḳhaak chhanvā.ī ki bas

ajnabī lagne lagā hai sub.h-e-ḳhandāñ kā jamāl

yuuñ huī ruḳhsat mirī āñkhoñ kī bīnā.ī ki bas

duur se jab sāhil-e-ummīd-o-yās aayā nazar

daf.atan ik mauj kashtī se vo Takrā.ī ki bas

is qadar haibat-zada thā ahd-e-tark-e-dostī

avval avval to tabī.at aisī ghabrā.ī ki bas

tā.er-e-sidra bhī ḳhā.if thā mirī parvāz se

aa ke manzil ke qarīb ik choT vo khaa.ī ki bas

aaj tak ubhrī nahīñ hai kashti-e-umr-e-ravāñ

āb-jū-e-dard meñ thī aisī gahrā.ī ki bas

maiñ ki ḳhvāb-e-nāz meñ āsūda shab hone ko thā

sūr-e-isrāfīl kī aisī sadā aa.ī ki bas

rafta rafta jal ke ḳhākistar huī aqlīm-jāñ

chhaT ga.e bādal magar phir dhuup vo chhā.ī ki bas

uqda-e-hairat 'muzaffar' jis ghaḌī khulne ko thā

zindagī ne kaan meñ vo baat batlā.ī ki bas

KHud tamasha ban gai chashm-e-tamashai ki bas

sang-e-dar par aaj ki hai wo jabin-sai ki bas

toD Dala main ne aaKHir us ka kaj-aks aaina

warna wo yun tha ajab mahw-e-tamashai ki bas

aisa lagta hai ki bazm-e-naz mein tanha hun main

chashm-e-bina ho to hai wo bazm-arai ki bas

zarre zarre ki zaban par naghma-e-jaan-soz hai

dasht-zar-e-gham ne aisi KHak chhanwai ki bas

ajnabi lagne laga hai subh-e-KHandan ka jamal

yun hui ruKHsat meri aankhon ki binai ki bas

dur se jab sahil-e-ummid-o-yas aaya nazar

dafatan ek mauj kashti se wo Takrai ki bas

is qadar haibat-zada tha ahd-e-tark-e-dosti

awwal awwal to tabiat aisi ghabrai ki bas

taer-e-sidra bhi KHaif tha meri parwaz se

aa ke manzil ke qarib ek choT wo khai ki bas

aaj tak ubhri nahin hai kashti-e-umr-e-rawan

aab-ju-e-dard mein thi aisi gahrai ki bas

main ki KHwab-e-naz mein aasuda shab hone ko tha

sur-e-israfil ki aisi sada aai ki bas

rafta rafta jal ke KHakistar hui aqlim-jaan

chhaT gae baadal magar phir dhup wo chhai ki bas

uqda-e-hairat 'muzaffar' jis ghaDi khulne ko tha

zindagi ne kan mein wo baat batlai ki bas