KHuda bachae mohabbat ki us bala se bhi

ḳhudā bachā.e mohabbat kī us balā se bhī

ki dard-e-dil nahīñ jaatā kisī davā se bhī

jalā rakhe haiñ mirī zindagī meñ sāñsoñ ne

charāġh aise ki bujhte nahīñ havā se bhī

mire liye mirā allāh kaun sā kam hai

mujhe to kaam nahīñ hai kisī ḳhudā se bhī

charāġh-e-rāh banāyā hai tum ne kis kis ko

kabhī mile ho mohammad ke naqsh-e-pā se bhī

ham apnī jaan usī par nisār karte haiñ

hameñ vo qatl kare chāhe jis adā se bhī

isī chaman meñ jo merā chaman hai merā chaman

bahut se peḌ mire ḳhuun ke haiñ pyāse bhī

sitam kisī pe vo karte nahīñ hamāre sivā

jafā to hai ye magar kam nahīñ vafā se bhī

dhaḌakte sher sune ham ne bint-e-'kaif' se aaj

mile ham ek mohabbat kī shā.era se bhī

KHuda bachae mohabbat ki us bala se bhi

ki dard-e-dil nahin jata kisi dawa se bhi

jala rakhe hain meri zindagi mein sanson ne

charagh aise ki bujhte nahin hawa se bhi

mere liye mera allah kaun sa kam hai

mujhe to kaam nahin hai kisi KHuda se bhi

charagh-e-rah banaya hai tum ne kis kis ko

kabhi mile ho mohammad ke naqsh-e-pa se bhi

hum apni jaan usi par nisar karte hain

hamein wo qatl kare chahe jis ada se bhi

isi chaman mein jo mera chaman hai mera chaman

bahut se peD mere KHun ke hain pyase bhi

sitam kisi pe wo karte nahin hamare siwa

jafa to hai ye magar kam nahin wafa se bhi

dhaDakte sher sune hum ne bint-e-'kaif' se aaj

mile hum ek mohabbat ki shaera se bhi