KHuda bhi meri tarah ba-kamal aisa tha

ḳhudā bhī merī tarah bā-kamāl aisā thā

tarāshā us ko jo mere ḳhayāl aisā thā

har ek lamha yahī Dar thā kho na jaa.e kahīñ

rahā vo paas magar ehtimāl aisā thā

thā titliyoñ ke paroñ sā latīf us kā badan

jo tāb-e-lams na rakkhe jamāl aisā thā

pighaltī chāñdī thā nisf-un-nahār par jab thā

bikhartā sonā thā sūraj zavāl aisā thā

jhukā.e rakhtā thā palkeñ vo bāteñ karte hue

kahāñ kā shoḳh thā ḳhalvat meñ haal aisā thā

laboñ se phuuT bahā giit siskiyāñ ban kar

ki lafz lafz meñ us ke malāl aisā thā

hue asiir to phir umr bhar rihā na hue

hamāre gird ta.alluq kā jaal aisā thā

KHuda bhi meri tarah ba-kamal aisa tha

tarasha us ko jo mere KHayal aisa tha

har ek lamha yahi Dar tha kho na jae kahin

raha wo pas magar ehtimal aisa tha

tha titliyon ke paron sa latif us ka badan

jo tab-e-lams na rakkhe jamal aisa tha

pighalti chandi tha nisf-un-nahaar par jab tha

bikharta sona tha suraj zawal aisa tha

jhukae rakhta tha palken wo baaten karte hue

kahan ka shoKH tha KHalwat mein haal aisa tha

labon se phuT baha git siskiyan ban kar

ki lafz lafz mein us ke malal aisa tha

hue asir to phir umr bhar riha na hue

hamare gird talluq ka jal aisa tha