خدا ہے شاہد کہ اس صنم سا کسی صنم کا بدن نہ دیکھا

خدا ہے شاہد کہ اس صنم سا کسی صنم کا بدن نہ دیکھا

سنی نزاکت سنی حلاوت کمر کو مثل دہن نہ دیکھا

ریاض دنیا کی کیا حقیقت ریاض جنت گو ہے تمنا

کسی نے اے عندلیب و قمری وہ سرو گل پیرہن نہ دیکھا

ہزاروں مضمون ہم نے باندھے چھپا جو موئے نظر کمر سے

لئے تصور نے لاکھوں بوسے جو روئے غنچہ دہن نہ دیکھا

خیال یعقوب میں نہ آتا گمان پیراہن پسر کا

ہزار افسوس اس نے تیرا پرانا بھی پیرہن نہ دیکھا

بنائے مدفن عجیب گھر ہے کب انہدام مکاں کا ڈر ہے

رہ فنا راہ بے خطر ہے یہاں غم راہ زن نہ دیکھا

غزل کا ہر شعر گرم تر ہے کلام رشکؔ آتش و شرر ہے

یہ صحبت مہرؔ کا اثر ہے کہ سرد اس کا سخن نہ دیکھا