KHuda hi jaane ye kar-e-sawab kaise hua

ḳhudā hī jaane ye kār-e-savāb kaise huā

vo apnī zaat meñ sho.ala thā aab kaise huā

tumhāre ghar se hī mansūb thā pata jis kā

tumhīñ batāo vo ḳhāna-ḳharāb kaise huā

har ek kaam thā us kā savāb meñ dāḳhil

phir aise bande pe nāzil azaab kaise huā

javāb is kā añdheroñ se pūchhnā hogā

jo kal thā zard vo aaj āftāb kaise huā

numū kā daḳhl thā us meñ ki ḳhud-numā.ī kā

vo mil ke ḳhaak meñ āḳhir gulāb kaise huā

janāb-e-'shān' ye zarra-navāzī kis kī hai

jo be-zabāñ thā vo ahl-e-kitāb kaise huā

KHuda hi jaane ye kar-e-sawab kaise hua

wo apni zat mein shoala tha aab kaise hua

tumhaare ghar se hi mansub tha pata jis ka

tumhin batao wo KHana-KHarab kaise hua

har ek kaam tha us ka sawab mein daKHil

phir aise bande pe nazil azab kaise hua

jawab is ka andheron se puchhna hoga

jo kal tha zard wo aaj aaftab kaise hua

numu ka daKHl tha us mein ki KHud-numai ka

wo mil ke KHak mein aaKHir gulab kaise hua

janab-e-'shan' ye zarra-nawazi kis ki hai

jo be-zaban tha wo ahl-e-kitab kaise hua