KHuda hua na koi aur hi gawah hua

ḳhudā huā na koī aur hī gavāh huā

likhā jo harf to hone kā ishtibāh huā

navāh-e-ishq talak khīñchtī ga.ī ḳhushbū

ik aisā gul mirī sāñsoñ pe iftitāh huā

ye kyā havas hai ki miltā mujhe ziyāda vo

mire liye to vo itnā bhī be-panāh huā

ajiib kiyā hai ki tum se nahīñ nibhī merī

mirā to ḳhud se bhī kam hī kabhī nibāh huā

kabhī kabhī tire dil tak pahuñch gayā mirā dard

kabhī huā to yahī ishq meñ gunāh huā

kisī bhī rañg meñ khiñchtī na thī mirī tasvīr

maiñ ban gayā koī kāġhaz agar siyāh huā

KHuda hua na koi aur hi gawah hua

likha jo harf to hone ka ishtibah hua

nawah-e-ishq talak khinchti gai KHushbu

ek aisa gul meri sanson pe iftitah hua

ye kya hawas hai ki milta mujhe ziyaada wo

mere liye to wo itna bhi be-panah hua

ajib kiya hai ki tum se nahin nibhi meri

mera to KHud se bhi kam hi kabhi nibah hua

kabhi kabhi tere dil tak pahunch gaya mera dard

kabhi hua to yahi ishq mein gunah hua

kisi bhi rang mein khinchti na thi meri taswir

main ban gaya koi kaghaz agar siyah hua