KHuda jaane dil ko mere kya hua hai

ḳhudā jaane dil ko mire kyā huā hai

tumhīñ se ḳhafā hai tumhīñ par fidā hai

taġhāful hī anjām se apne behtar

tirī be-ruḳhī se mirī ibtidā hai

maiñ ḳhud ma.anī-e-husn huuñ ai sitamgar

magar kuchh judā.ī meñ terī mazā hai

mirā dil hai markaz tumhāre sitam kā

kisī par kiyā tum ne mujh par huā hai

maiñ is daur-e-hastī meñ vo dā.era huuñ

ki har intihā par mirī ibtidā hai

na kuchh kah sakā maiñ na samjhe vahī kuchh

bahut der sochā ki kyā mudda.ā hai

mujhe apne hone ke haiñ laakh shikve

kiyā tum se shikva ye apnā gila hai

hai mardūd-e-dair aur ka.abe se fāriġh

na momin na kāfir ye dil kyā balā hai

maiñ har falsafe kī haqīqat huuñ 'maikash'

maiñ jis meñ nahīñ falsafa hī vo kyā hai

KHuda jaane dil ko mere kya hua hai

tumhin se KHafa hai tumhin par fida hai

taghaful hi anjam se apne behtar

teri be-ruKHi se meri ibtida hai

main KHud mani-e-husn hun ai sitamgar

magar kuchh judai mein teri maza hai

mera dil hai markaz tumhaare sitam ka

kisi par kiya tum ne mujh par hua hai

main is daur-e-hasti mein wo daera hun

ki har intiha par meri ibtida hai

na kuchh kah saka main na samjhe wahi kuchh

bahut der socha ki kya muddaa hai

mujhe apne hone ke hain lakh shikwe

kiya tum se shikwa ye apna gila hai

hai mardud-e-dair aur kabe se farigh

na momin na kafir ye dil kya bala hai

main har falsafe ki haqiqat hun 'maikash'

main jis mein nahin falsafa hi wo kya hai