خدا جانے نوائے بے فغاں سے کون گزرا ہے

خدا جانے نوائے بے فغاں سے کون گزرا ہے

بہ خاموشی ہماری داستاں سے کون گزرا ہے

ندامت لالہ و گل کی پریشاں بوئے پیراہن

ہمیں معلوم ہے اس گلستاں سے کون گزرا ہے

تھی معراج محبت یا عروج عظمت انساں

فرشتے چپ مکان و لا مکاں سے کون گزرا ہے

شکستہ ناؤ شب تاریک ساحل دور طوفاں تیز

مگر با‌ ایں ہمہ موج رواں سے کون گزرا ہے

یہ کس کی آبلہ پائی سے خار و سنگ ہیں گل گوں

طلب کی راہ میں ہر امتحاں سے کون گزرا ہے

لئے اپنی جبیں پر مضطرب سجدوں کا نذرانہ

پئے یک آستاں ہر آستاں سے کون گزرا ہے

ہمارے بعد بھی جو آنے والے ہیں وہ پوچھیں گے

یہ ہیں نقش قدم کس کے یہاں سے کون گزرا ہے