KHuda jaane wo kyunkar is qadar hum ko satate hain

ḳhudā jaane vo kyūñkar is qadar ham ko satāte haiñ

sitam phir ye ki phir vo hī hamāre man ko bhāte haiñ

yahī dastūr hai shāyad zamāne kī mohabbat kā

jise ham pyaar karte haiñ vahī dil ko dukhāte haiñ

sañbhal kar baiThnā tum imtihān-e-‘ishq meñ sāhib

ye vo parcha hai jis meñ log aksar maat khāte haiñ

riyāzī falsafa science ye bhī Thiik hai lekin

kahāñ ham apne bachchoñ ko magar urdu sikhāte haiñ

vo kaise log haiñ jo chaar din bas 'ishq karte haiñ

phir us ke baa'd saare rishte-nāte bhuul jaate haiñ

kahāñ ab vo bhī ham ko vaqt dete haiñ bahut 'ashraf'

so ham bhī shaam ko ghar jaldī vāpas lauT aate haiñ

KHuda jaane wo kyunkar is qadar hum ko satate hain

sitam phir ye ki phir wo hi hamare man ko bhate hain

yahi dastur hai shayad zamane ki mohabbat ka

jise hum pyar karte hain wahi dil ko dukhate hain

sanbhal kar baiThna tum imtihan-e-‘ishq mein sahib

ye wo parcha hai jis mein log aksar mat khate hain

riyazi falsafa science ye bhi Thik hai lekin

kahan hum apne bachchon ko magar urdu sikhate hain

wo kaise log hain jo chaar din bas 'ishq karte hain

phir us ke ba'd sare rishte-nate bhul jate hain

kahan ab wo bhi hum ko waqt dete hain bahut 'ashraf'

so hum bhi sham ko ghar jaldi wapas lauT aate hain