خدا جب تک نہ چاہے کچھ کسی سے ہو نہیں سکتا

خدا جب تک نہ چاہے کچھ کسی سے ہو نہیں سکتا

ولی سے ہو نہیں سکتا نبی سے ہو نہیں سکتا

توجہ شرط ہے کیا آدمی سے ہو نہیں سکتا

مگر ہمت ہی کرنا کاہلی سے ہو نہیں سکتا

کروں کیوں التجا غیروں کے آگے تنگ دستی کی

بدل ڈالے مقدر یہ کسی سے ہو نہیں سکتا

اگر جاہل کا پردہ ہے تو اہل علم کی زینت

مگر نقصان اپنا خامشی سے ہو نہیں سکتا

برائی اس کی کر کے کیوں کروں میں اپنا دل ہلکا

مرا نقصان جس کی دشمنی سے ہو نہیں سکتا

پریشاں مفلسی سے آپ ہی وہ کیوں نہ ہو لیکن

فقیروں کو جھڑک دینا سکھی سے ہو نہیں سکتا

گھٹائیں یاس کی امید پر جب تک نہ چھا جائیں

کوئی بیزار اپنی زندگی سے ہو نہیں سکتا

اسی ظالم نے شاید راز میرا کر دیا افشا

پتے کی بات کہنا اجنبی سے ہو نہیں سکتا

گناہوں سے وہی ڈرتا ہے جس کو خوف خالق ہے

فریب نفس سے بچنا سبھی سے ہو نہیں سکتا

کلیجا قیس کا دل کوہ کن کا چاہئے سیفیؔ

کسی پر جان دینا ہر کسی سے ہو نہیں سکتا