KHuda ka shukr ada subh-o-sham karte hain

ḳhudā kā shukr adā sub.h-o-shām karte haiñ

jo ḳhaas bande haiñ vo ḳhaas kaam karte haiñ

ḳhudā-parast samajhte haiñ farz ḳhidmat-e-ḳhalq

rifāh-e-ām meñ koshish mudām karte haiñ

ḳhudā kī raah meñ hāzir haiñ bandagān-e-ḳhudā

bashar haiñ par ye farishtoñ ke kaam karte haiñ

jo kār-e-ḳhair meñ rahte haiñ raat din mashġhūl

vahī bahisht meñ jā kar qiyām karte haiñ

yahāñ ham aa.e haiñ kyoñ jin ko ye ḳhayāl nahīñ

fuzūl umr vo apnī tamām karte haiñ

kahāñ hai qaisar o qasr-e-buland-bām kahāñ

yahāñ jo aate haiñ chande qiyām karte haiñ

jo āsmāñ se na jhukte the dekhe ai ġhāfil

tah-e-zamīñ vo lahad meñ maqām karte haiñ

suḳhan nahīñ pa.e-tasḳhīr-e-dil ye sehr-e-bayāñ

zabān-e-ġhaib se goyā kalām karte haiñ

mufīd-e-ām suḳhan ho ye shart hai 'raushan'

ki is kī qadr ḳhud ahl-e-kalām karte haiñ

KHuda ka shukr ada subh-o-sham karte hain

jo KHas bande hain wo KHas kaam karte hain

KHuda-parast samajhte hain farz KHidmat-e-KHalq

rifah-e-am mein koshish mudam karte hain

KHuda ki rah mein hazir hain bandagan-e-KHuda

bashar hain par ye farishton ke kaam karte hain

jo kar-e-KHair mein rahte hain raat din mashghul

wahi bahisht mein ja kar qiyam karte hain

yahan hum aae hain kyon jin ko ye KHayal nahin

fuzul umr wo apni tamam karte hain

kahan hai qaisar o qasr-e-buland-baam kahan

yahan jo aate hain chande qiyam karte hain

jo aasman se na jhukte the dekhe ai ghafil

tah-e-zamin wo lahad mein maqam karte hain

suKHan nahin pae-tasKHir-e-dil ye sehr-e-bayan

zaban-e-ghaib se goya kalam karte hain

mufid-e-am suKHan ho ye shart hai 'raushan'

ki is ki qadr KHud ahl-e-kalam karte hain