خدا کا شکر کہ سنتا رہا خدا میری

خدا کا شکر کہ سنتا رہا خدا میری

کبھی نہ عرش سے لوٹی کوئی دعا میری

میں مانگتی ہوں اسی سے کہ وہ مرا رب ہے

اسے پسند ہے شاید یہی ادا میری

چلا گیا تھا جو واپس پلٹ بھی سکتا تھا

مگر گلے میں پھنسی رہ گئی صدا میری

شمار ہوتے ہیں شاید وہ سب فرشتوں میں

گناتے رہتے ہیں جو لوگ ہر خطا میری

حیات و موت کے آگے بھی زندگی ہے کہیں

نہ ابتدا ہے مری یہ نہ انتہا میری

یہ وقت نزع مرا چارہ گر سمجھ پایا

بس ایک لفظ محبت کا تھا دوا میری

بدل رہی ہوں مصور میں اپنے دھندلے رنگ

اب ایک بار یہ تصویر پھر بنا میری

ہمیشہ چاہا کہ صبر و رضا پہ شعر کہوں

ہمیشہ فکر رکی جا کے کربلا میری

مرے امام بھی حق گو رہے سر نیزہ

حناؔ علم بھی رہی عزم کی ردا میری