KHuda kah kah ke jis par jaan ware ja rahe hain

ḳhudā kah kah ke jis par jaan vaare jā rahe haiñ

na jaane kaun hai kis ko pukāre jā rahe haiñ

ye kyā kam hai ki zinda hai tumhāre ba.ad bhī ham

ki is pe hijr ke ye din guzāre jā rahe haiñ

kisī jānib se tum bhī do hameñ āvāz jānāñ

hamīñ tum ko añdhere meñ pukāre jā rahe haiñ

ba-juz ik jañg ke phir jītne ko kyā rahegā

junūn-e-jañg meñ īmān haare jā rahe haiñ

kahāñ ab jā ke ham baiTheñge ro.eñge hañseñge

sunā hai ye khañDar saare sañvāre jā rahe haiñ

mujhe in rat-jagoñ se to pareshānī nahīñ hai

yahī ġham hai ki mere ḳhvāb maare jā rahe haiñ

kisī dariyā meñ ham Thahre hue ye dekhte haiñ

baḌī raftār se donoñ kināre jā rahe haiñ

chalo is raat kā qissa huā ab ḳhatm yaaro

thake-hāre hue shab ke sitāre jā rahe haiñ

KHuda kah kah ke jis par jaan ware ja rahe hain

na jaane kaun hai kis ko pukare ja rahe hain

ye kya kam hai ki zinda hai tumhaare baad bhi hum

ki is pe hijr ke ye din guzare ja rahe hain

kisi jaanib se tum bhi do hamein aawaz jaanan

hamin tum ko andhere mein pukare ja rahe hain

ba-juz ek jang ke phir jitne ko kya rahega

junun-e-jang mein iman haare ja rahe hain

kahan ab ja ke hum baiThenge roenge hansenge

suna hai ye khanDar sare sanware ja rahe hain

mujhe in rat-jagon se to pareshani nahin hai

yahi gham hai ki mere KHwab mare ja rahe hain

kisi dariya mein hum Thahre hue ye dekhte hain

baDi raftar se donon kinare ja rahe hain

chalo is raat ka qissa hua ab KHatm yaro

thake-haare hue shab ke sitare ja rahe hain