KHuda kare rahe jari payam-e-yar nisar

ḳhudā kare rahe jaarī payām-e-yār nisār

ki tere ba.ad ye hai terī yādgār nisār

kisī kī bhī nahīñ sunte haiñ aaj yaar nisār

hazār koī pukārā kare nisār nisār

chhalakte jaam haiñ hūreñ haiñ bāġh-e-jannat hai

uḌā rahe haiñ maze kyā tah-e-mazār nisār

dam-e-aḳhīr kuchh is tarah pher liiñ āñkheñ

na the zamāne meñ goyā kisī ke yaar nisār

ravā-ravī meñ utāre na aks bhī utrā

havā ke ghoḌe par aa.e the kyā savār nisār

ye us kī shān-e-karīmī nisār ko baḳhshā

hazār baar fidā haiñ hazār baar nisār

bichhaḌne vaalo kabhī tum na chhoḌnā dāman

chale haiñ lūTne firdaus kī bahār nisār

abhī ye phuuT ke ro.e na luuñ jo zabt se kaam

bharī hai mujh se bahut chashm-e-ashk-e-bār nisār

'riyāz' fātiha paḌhne na tum ga.e ab tak

tumhāre vāste haiñ mahv-e-intizār nisār

KHuda kare rahe jari payam-e-yar nisar

ki tere baad ye hai teri yaadgar nisar

kisi ki bhi nahin sunte hain aaj yar nisar

hazar koi pukara kare nisar nisar

chhalakte jam hain huren hain bagh-e-jannat hai

uDa rahe hain maze kya tah-e-mazar nisar

dam-e-aKHir kuchh is tarah pher lin aankhen

na the zamane mein goya kisi ke yar nisar

rawa-rawi mein utare na aks bhi utra

hawa ke ghoDe par aae the kya sawar nisar

ye us ki shan-e-karimi nisar ko baKHsha

hazar bar fida hain hazar bar nisar

bichhaDne walo kabhi tum na chhoDna daman

chale hain luTne firdaus ki bahaar nisar

abhi ye phuT ke roe na lun jo zabt se kaam

bhari hai mujh se bahut chashm-e-ashk-e-bar nisar

'riyaz' fatiha paDhne na tum gae ab tak

tumhaare waste hain mahw-e-intizar nisar